• أرشيف المواضيع

  • التصنيفات

  • أضفنا

    Bookmark and Share

رحلتي

رحلتي من الإيمان للشك للإيمان

هى مجرد قصة, ربما تكون حقيقة او خيال. ربما تكون لى او لغيرى.

لكنها قصة تدعوا للعقل بعيدا عن تخاريف الأحلام و الظهورات, قصة تدعوا لأعمال العقل قليلا.

=====================================

الحلقة الأولى

(وانا كان مالى)؟

الأول الايمان كان شديد جدا..وخاصة فى مرحلة الثانوية العامة..كالعادة صلاة في الجامع

مش عارف ليه كنت فاكر ان الصلاة ماكنش ليها علاقة بالثانوية؟؟

أو كنت باحاول أقنع نفسي بكده

بس مع الأسف مع أول سنة فى الكلية..بطلت صلاة فى الجامع..مش بس كده..بطلت صلاة خالص

بس ماقدرتش..كنت فعلا تعبان من غير صلاة..وفى السنة الثانية عدت بقوة للصلاه والحمد لله

وعدت لقراتى في الدين مرة أخرى بعد أن كنت قد تركتها منذ الصف لأول الثانوى

واستمررت هكذا حتى السنة الرابعة

اذن..أستطيع أن أقول أن الأصل فى كان مؤمنا جدا..ولكن ما حدث بعد ذلك كان مرعبا

مرعبا الى أقصى درجة..ربنا يغفرلي ويسامحنى

كنت زي أى مسلم في الدنيا..مؤمن بالفطرة ان أى حاجة تانية غير الاسلام غلط

وماينفعش غير الاسلام..ولفيت لفيت ورجعت لنفس النقطة..واتأكدت وبصمت بالعشرة ان ماينفعش غير الآسلام

البداية كانت فى سنة رابعة.

أول مرة أشوف مناظرة دينية بين الشيخ أحمد ديدات رحمه الله وآخر مسيحى أمريكى.

المناظرة عجبتنى أوى.

ولتفوق أحمد ديدات الواضح..وعشقى لدينى

شوفتها اكتر من 4 مرات رغم طولها..وكل مرة يزيد ايمانى أكتربصراحة الشيخ ديدات ده متمكن جدا فعلا.

بس فيه حاجة!؟على أد ما انجذبت لهذه النوعيه من الموضوعات..على أد مابدأت افكر فى الأديان الأخرى.

وأسال نفسى..أنا مسلم ليه؟؟

عشان أهلى مسلمين؟؟طب ماهو لو كانوا حاجة تانية كنت بقيت زيهم!!!

وبدأت أسأل نفسى..ليه المسيحين مسيحين؟؟ليه ميفكروش فى الاسلام؟؟

رد عليا واحد انجليزي على النت(مانا أصلى بقيت أكلم الأجانب في الموضوع ده كتير) قال لى

اشمعنا؟؟ماتفكر انت فى حاجة تانية غير الاسلام!!بينى وبينكم اكتشفت انها انانيه انى اقول لواحد فكر في ديني من غير ما أفكر انا كمان.

وبدأت بالفعل تنظيم أفكارى.

وأثناء هذا التنظيم..حدثت مفاجأة!!

ما هو التنظيم..وما هى المفاجأة؟؟ الحلقة القادمة ان شاء الله

لا اله الا الله

=====================================

الحلقة الثانية

(الموضوع خرج من ايدى)؟

زى ما اتفقنا..بدأت أرتب أفكارى..و قابلتنى مفاجأة..ّ

بالنسبة لترتيب الأفكار..كان كالتالى:ّ

1-انا مسلم ليه؟؟عشان أهلى مسلمين….اجابة غير مقنعة

2-هل فى احتمال ولو بنسبة واحد فى المليون انى أعيش مسلم وأراعى ربنا فى كل حاجة ويوم القيامة افاجأ ان اليهود أو النصارى على حق و بالسلامة على جهنم؟؟

3-الشيطان صورلي ساعتها ان ممكن

4-اذن لابد من اجابة سريعة على اسئلتى عشان لو الموت خطفنى دلوقتى..مش حاحصل اى حاجة..لامسلم ولا مسيحى ولا يهودى..يمكن يئرفوا منى يوم القيامة!!..مين ده؟؟ده اللى ماكانش عارفلوا دين..

ياععععععععع!!

5-حال المسلمين اليومين دول زى مانتوا شايفين..والمسيحين برده زى مانتوا شايفين..هل هذا يدل علي شئ؟؟

6-العالم المتقدم مسيحى..بس مش مسيحى بس..ده يهودى كمان..لأ..مش بس كده..البوذيين والهندوس وغيرها من ديانات شرق آسيا أكثر تقدما..هل يدل هذا على شئ؟؟آه طبعا..ان مش ده النقطة اللى أحكم بيها على صحة العقيدة

7-طب وبقيت الديانات؟؟الناس اللى هناك ده(اليابانيين و الصينيين و خلافهم) أكثر اهل الأرض تقدما واحتراما وجدية متدينين بالديانات الغريبة ده مش ده ممكن يكون نابع من صدق عقيدتهم؟؟ وخاصة انى معرفش اى حاجة عنها؟؟ليه ياتري مافكرش فيها؟؟

(خلوا بالكم ان الشيطان دلوقتى بعتنى لمكان بعيد جدا)8-بس بالنسبة للديانات ده الأمر بسيط..أنا مش ممكن أسجد لبقرة!!!ولا لتمثال الحاج بوذا!!!ّده فى حد ذاته قمة التخلف..

9-طب ليه الناس ده متقدمة؟؟أكيد فيه عوامل تانية..عرفتها بعدين..وحاقولهلكم انشاء الله فى آخر حلقة..بس حد يفكرنى10-اذن الموضوع تم حصره فى ثلاث أديان..يا بلاش..كده أسهل بكتير

11- نتوكل علي الله ونبدأ ..حاتبقى رحلة شاقةآه صحيح ماقلتش المفاجأة اللى قابلتنى..الحلقة الجاية ان شاء الله..هي ترتيبها بعد تنظيم الأفكارادعولىلا اله الا الله

=====================================

ّالحلقة الثالثة

(كده بجد خطر..!!!)

اول ما بدأت المشوار قلت لنفسى ياواد انت حاتتعب نفسك ليه؟؟ دى حلقة زغلول النجار لوحدها كفيلة بان شارون يعلن اسلامه ويبقى من كبار الدعاه!!

كفاية كم المعجزات اللى في القرآن.. بس الشيطان الله يلعنه..ماسبنيش “انت ايه اللى ضمنك ان القرآن ده صحيح؟؟

ومين اللى قالك ان ده اللى نزل على سيدنا محمد صلى الله عليه وسلم؟؟

وحتى لو كان صحيح وماتغيرش منه حاجه..مين اللى قالك ان الكتب التانيه اتحرفت؟؟

هو انت شوفت حاجة بعنيك؟؟كله كلام بتسمعه و بتقرأه.. لكن عمرك ماحاولت تتأكد من صحته..سمعت عن تناقضات الكتب التانية..

بس ماحاولتش تتأكد بنفسك..

ازاى تكون متأكد كده من كلام أقرب واحد فيهم كان عايش من 1400 سنة؟؟

واشمعنا يعنى انت مؤمن ان القرآن ماتحرفش و الباقى اتحرفوا؟؟

هى مش كتب سماوية برده؟؟ ليه ربنا ماحفظهاش هى كمان؟؟

ثم وايه يعنى موضوع المعجزات؟؟ ما أكيد الكتب التانيه فيها معجزات

ثم انت عمال تقرأ فى كتب اسلامية طول عمرك وتقرأ فى كلام بيتآل على المسيحية

ليه مابتقرأش فى حاجه بتتقال على الاسلام؟؟مش تشوف الناس ده وجهت نظرها ايه؟؟

وايه يعنى المناظرات؟؟ أكيد هما كمان عندهم حاجات زى دي

وهكذا..شوفتواالشيطان عمل فيا ايه؟؟..لا وغيركده كتير..بس أنا مش عايز أطول

وكانت المشكلة للى بتواجهنى هى ازاى أحكم على الدين ان هو ده الدين الصحيح؟؟

فكرت كتير قوى قوى قوى..وتوصلت لحاجة كانت هى أفضل حاجة عملتها فى الموضوع قولت لنفسى..انا أعرف فى الاسلام..والاسلام باقى منه قرآن وسنة..السنة والأحاديث عليها جدل من حيث صحتها.

واحنا نفسنا يامسلمين مصنفين الأحاديث لضعيفة وحسنة وموضوعة و و وحاجات كتير.

ده غير ان ربنا ماتعهدش بحفظها بشهادتنا احنا يامسلمين.

اذن لاأضع السنة والأحاديث كقوام رئيسى للحكم على الاسلام..يعنى لما يقابلنى حد يقول لى الرسول بتاعكم عمل كذا وكذا..وفيه حديث صحيح بيقول ان موسى ضرب عزرائيل على عينه صفهالو..يبقى ده مايساهمش بأى حال من الأحوال فى انى أشك فى الاسلام

يبقى لو حاقرأ فى حاجات بتتهم الاسلام..يبقى لازم الغلط اللى حد يطلعهولى يكون فى القرآن..مش فى حاجة تانية والعكس بالعكس.

يعنى اللى حاقراه ضد المسيحية واليهودية لازم يكون الغلط فى الانجيل أو التوراه نفسها..

ولما الاقيه فعلا غلط..أفكر فيه شوية بعقلى بدون تحيز وأحاول اجد له مبرر.

ولو ماعرفتش ابحث فى تفسير الحتة ده..وسهل انى الاقى حد يبررهالى فى القرآن..الشيوخ مليين الجوامع والكتب مغرقة الدنيا
بس فى المسيحية حتكون مشكلة..مش حروح لقس اسأله طبعا

طب وفى اليهودية..حاجيب حاخام يهودى من آنى داهيه؟؟

يبقى حاعتمد على عقلى بقدر كبير فى الحكم على الأمور..ومش هاتحيز لحاجة..حالغى كل عواطفى.

وربنا يستر وقلت لنفسى ياترى أبدأ منين

أول حاجة لازم يكون فيه عدل..القرآن لغته العربيه..بس الانجيل و التوراه أساسا عبرى و يونانى.

يبقى عشان أعدل..يبقى لازم أتجاهل الاعجاز اللغوى فى القرآن..عشان يمكن يكون التوراه والانجيل فيهم اعجاز لغوى عمرى ماحوصلله.

(ماتقلقوش..القرآن مليان معجزات) ماشى كده؟؟ ومن هنا ورايح..حاسيب عقلى يحكمانا دلوقتى أمام ثلاث كتب..معايا واحد..أجيب التانيين منين؟؟

بسيطه أوى..مغرقين النت فى كل داهيه..وأول مره لحظتها أعرف المفاجأه دى:المسيحين بيؤمنوا بحاجه اسمها الكتاب المقدس..وده مقسومة الى قسمين أساسيين

1-العهد القديم(التوراه) 39 سفر او قسم او كتابّ

2-العهد الجديد(الانجيل)27 سفر او قسم او كتابّ

يعنى المجموع 66..ده غير 7 اسفار ممنوعين عند بعض الطوائف المسيحية

ماعلينا من الطوائف..انا مايهمنيش غير الكتاب المقدس نفسه.. لا ارثوذوكس ولا بروتستانت ولا اى حاجة..

وعشان افهمكم التقسيمه..:

احنا عندنا مثلا اجزاء..وسور..وآيات…….

هم عندهم اسفار..واصحاحات..وأعداد

وكل سفر له اسم..يعنى لمل أقول مثلا: متى(12)..يعنى سفر متى(أول سفر فى العهد الجديد) الاصحاح الأول العدد الأول..مفهوم؟؟

عشان حنتكلم بالشكل ده كتير بعد كده

أنا دخلت فى الجد..كده أقدر اقول لكم المفاجأة اللى قابلتنى..بس مش المره ده..المره الجايه ان شاء الله

نتقابل الحلقة القادمه ان شاء الله

انتظرونى عشان الجد حايبدأ

لا اله الا الله

=====================================

الحلقة الرابعة

(الموضوع محتاج وقت)

زى ماشوفتم..الموضوع اقتصر على كتاب واحد..اللى هو الكتاب المقدس..عشان فيه التوراه (من أسفار العهد القديم)..والعهد الجديد (الانجيل).

وعشان أكون اكثر تحديدا..العهد القديم المقصود بيه الأسفار اللى قبل سيدنا عيسى..يعنى أسفار سيدنا موسى اللى هم اول خمسة فى العهد القديم
(التكوين, الخروج, الاويين, التثنية ،العدد)..وكتب الأنبياء والمزامير (الزابور)

والعهد الحديد وهو مجموع ما كُتب من أسفار بعد مجيء المسيح وعدد أسفاره (27) سفراً.

ويحتوى على الأناجيل الأربعة(متى, مرقس, لوقا. يوحنا)… ده بالاضافة لجزء يسمى أعمال الرسل.. وجزء تانى رسالات المسيحيين بيؤمنو بالاتنين.. بس الاختلاف بينهم وبين اليهود فى التفكير بس..الموضوع ماكنش كده زمان..!

الحكاية ان التوراه فيها منهج حياه..اما الانجيل مافيهوش منهج.. ده فيه وجدانيات ايمان.. يعنى لوحده ماينفعش للمعيشه ولما المسيحين انتبهوا للموضوع ده.. حطوهم على بعض.. عشان كده تلاحظوا ان ربنا دائما يقول.. “وعندهم التوراه”.. عشان فيها فعلا أحكام و مناهج..وده نقطة سابقة لأوانها عرفتها بعدين..ّ

نرجع لحكايتنا..

مابدأتش بالكتاب المقدس.. بدأت بحاجة تانية.. قلت ادور أشوف هم كمان بيقولو ايه.. والنت مليان بلاوى.. واكتشفت لأول مرة.. الحملة الشنيعة ده.. حملة على الاسلام في كل حتة.. وفي كل مكان.. وبكل اللغات.. يقودها نصارى او ناس نتدعى انها نصارى.. (بس انا أعتقد انهم يهود) وأكتر حاجة بالعربى..كأنها موجهة لينا..وساعتها حسيت انها موجهه ليا انا مخصوص..

وتعالوا نبدأ سوا.. وصلنى email بداية البحث بدأ بـ:وده نسخة من نص ال email””صور لسفينة نوح عليه السلام بعد أن عثرت عليها بعثة الآثار و من المعاينة الأولية وجد أن عمر السفينة يصل إلى أكثر من 100 ألف سنة… تقول بعثة الآثار أنهم وجدواالسفينة على جبل الجودي في تركيا … وقد ذكر الإنجيل أن السفينة رست على على جبل أرارات طبعا كان هناك بعثة مسيحية تنقب عن هذه السفينة.

وكانت خيبتهم كبيرة عندما وجدت السفينة على جبل الجودي ومما لاشك فيه أن هذا يمثل ضربة موجعة لمصداقية الإنجيل ومما زاد غضبهم أن القرآن لم يخطيء في تحديد موقع سفينة نوح عليه السلام جبل الجودي هو الموقع الذي حدده القرآن الكريم ليثبت فعلا أنه معجزة من الله وأنه دين الحق في سورة هود الآية

يقول تعالى(وقِيلَ يَا أَرْضُ ابْلَعِي مَاءكِ وَيَا سَمَاءأَقْلِعِي وَغِيضَ الْمَاء وَقُضِيَ الأَمْرُ وَاسْتَوَتْ عَلَى الْجُودِيِّ وَقِيلَ بُعْداً لِّلْقَوْمِ الظَّالِمِينَ)ّ

وفي سورة هود الآية 49 يقول تعالى (تِلْكَ مِنْ أَنبَاء الْغَيْبِ نُوحِيهَا إِلَيْكَ مَا كُنتَ تَعْلَمُهَا أَنتَ وَلاَ قَوْمُكَ مِن قَبْلِ هَذَا فَاصْبِرْ إِنَّ الْعَاقِبَةَ لِلْمُتَّقِين)””

وكان معاه الصور كمان.. قلت كويس قوى.. بدايه كويسة لصالح الاسلام..

بس برده.. ماتضمنش.. لازم تتأكد بنفسك وفضلت أدور اسبوع على حقيقة الموضوع ده.. وساعتها.

قابلتنى المفاجأة اللى كنت باقللكم عليها..مفاجأة طيرت النوم من عينى!!بس مش حاقولها المره ده المرة الجاية ان شاء اللهياترى ايه المفاجأة اللى قابلتنى؟؟ ده سؤال الحلقه ده

الى اللقاء فى الحلقة القادمة

لا اله الا الله

=====================================

الحلقة الخامسة

(المفاجأة)!!!


طبعا زهقتو منى شوية..معلش..أومال لما ادخل فى المفاجآت الكبيرة.. حاتعملوا فيا ايه؟؟

الحلقه ده مخصوص عشان المفاجأة.. بس باحبذ انى ماقولهاش المرة ده عشان..خلاص ماتزعاقوش..

حاقولها اهه.. طبعا.. تابعتوا اللى حصل .. وأرجوا انكم تراجعوا نص الemail اللى وصلنى راجعتوه..؟ وفهمتوه؟؟انا بقه حبيت أتأكد من الكلام ده بنفسى وقابلتنى المفاجأة دي..المسيحيين واليهود عاملين باللو فى كل حته السفينة موجودة على جبال أراراط!!!!.. لا ومش كده وبس.. دول كاتبين زى ماحنا كاتبين كمان.. “ضربة قاسمة للقرآن اللى قال انها على جبل الجودى!!!!!!!والغريبة..انها نفس الصور..فتحت تانى الصور الى وصلتنى..ودققت فيها.. ولقيت الكلام ده مكتوب عليها:

“and on the seventh month, on the seventeenth day of the month, the ark rested upon the mountains of ararat”(gen 8:4)

وده ترجمة الكلام ده

(ّوَاسْتَقَرَّ الْفُلْكُ عَلَى جِبَالِ أَرَارَاطَ فِي الْيَوْمِ السَّابِعَ عَشَرَ مِنَ الشَّهْرِ السَّابِعِ لِلطُّوفَانِ)
تكوين(8\4)

يعنى حتى الصورة الى بعتنهالى المسلمين فى الemail واخدينها منهم زى ما هي..

طب انا أعمل ايه دلوقتى؟؟ اصدق مين؟؟ ده بدايه مش كويسة ابدا..لازم أدور أكتر عشان أوصل للحقيقة.. وفضلت أدور ومافيش فايدة..

كل المواقع العلمية بتقول جبال أراراط.. مش الجودى.. لأ… انا كده دماغى حاتضرب..انا قلت حاحكم عقلى ومش حابقى ظالم..ولو حكمت عقلى فى الموقف ده حاتبقى مشكلة… يارب انقذنى أنا عايز أوصلك

بقيت مش عارف أعمل ايه.. كل الدنيا.. بتقول أرارات.. واحنا بنقول الجودى..

وحتى ال email اللى وصلنى.. خد الصور وحط عليها كلام من دماغه؟؟وهى دي النقطه اللى أنا عايز أوصلها يا جماعة.. مهما كنت بتحب دينك.. اوعى.. اوعى.. اوعى.. تدعيله بالكدب… مهما كنت واثق ان كدبتك مش حاتتكشف.. اوعى.. لان هذا يفقدك الحجة والمصداقية وموضوع أرارات ولا الجودى ده.. انا عرفتو بعدين.. وحاقوله فى وقته ان شاء الله .. المهم.. بالنسبة لموضوع الemail

انا عايزكوا تتخيلوا حالتى النفسية كانت عامله ازاى؟؟كان ممكن ساعتها انتحر او يحصلى حاجة..أخاف أسأل أى حد..يقولولى انت كافر.. ماكنتش عارف أعمل ايه؟؟سيبت موضوع السفينة خالص واتجهت بعقل مشوش وقلب محطم الى جزئية أخرى.. الى الحاجات اللى هم بيقولوها علينا.. والغلطات اللى هم مطلعنهلنا..

المهم.. زى ما اتفقنا مش حابص على أى غلطات يطلعوها فى الروايات والأحاديث الشريفة.. انا كمسلم.. مؤمن بيها.. بس عارف انها عرضة للتحريف..

يعنى لازم الغلط او التناقض أو الشئ الغير منطقى يكون فى القرآن

حابدأ كده رحلة جديده..رحله يا اما حاتقضى عليا.. يا اما حاتفوقنى..ادعولى..بالمناسبة..حد يعرف حقيقة موضوع سفينة نوح؟؟

انا آسف مش حاقوله دلوقتى عشان تبقوا عايشين معايا لحظة بلحظة..

اللى يعرف يتفضل يقول..وانا برده حاقول فى الآخر ان شاء الله..الى اللقاء فى الحلقة السادسه ان شاء اللهلا اله الا الله

=====================================

الحلقة السادسة

(المقياس) انا دلوقتى مشوش..مش فاهم حاجة وادينى داخل على مرحلة جامدة قوى حاشوف بالظبط بيقولوا علينا ايه..

ومش حاسمع كلام حد.. انا دلوقتى مابصدقش أى حد وحاحط قوانين حامشى عليها فى البحث بتاعى..1-ممنوع آخد رأى حد..أنا حاسأل أسئلة محددة وعايز اجابات مقنعة بدون محاولات اقناع وحاحكم انا بعقلى2- لو كنت حاسأل حد يبقى حاسأل كل واحد فى دينه و مش حادىفرصة لحد يقنعنى.. كل اللى عليه انه يجاوبنى ويسيب موضوع الاقتناع ده ليا انا

3-انا عندى دلوقتى كتابين واحد منهم أكيد هو اللى صح.. ماينفعش الاتنين

4-طبعا عشان كل واحد فيهم بيقول كلام غير التانى

5-الاعجاز فى الكتاب المقدس شئ طبيعى لو لقيته ومش نقطة على حساب القرآن ولا حاجة… وده عشان القرآن بيقول انه اتحرف.. يعنى برده لسه فيه ريحه من كلام ربنا

6-طب أعرف منين انهى كتاب اللى صح فيهم؟؟.. بسيطة..

حسب كلام النصارى.. ان القرآن مش كلام الله.. عشان لو كان كلام الله كانوا لازم يؤمنوا بيه..وطالما انه مش كلام ربنا.. يبقى لازم فيه أخطاء وتناقضات..

وحاجات هبله ماتصدرش من اله وحسب كلامنا يا مسلمين.. ان الكتاب المقدس محرف.. وده يخلى التوازن الالهى يختل.. يبقى لازم فيه أخطاء وتناقضات..

وحاجات هبله ماتصدرش من اله

شوفتوا تعبت اد ايه عشان أوصل لقانون يحكملى اذا كان ده كلام ربنا ولا لاء؟؟

وطبعا القانون ده موجود فى القرآن وكان يغنينى عن التفكير بمنتهى البساطه

بسم الله الرحمن الرحيم

“افلا يتدبرون القرآن.. ولو كان من عند غير الله لوجدوا فيه اختلافا كثيرا”

شايفين العظمة؟؟ ماتتخيلوش سعادتى كانت اد ايه لما توصلت بعقلى لحاجة فى القرآن..

بس انا قلت ايه؟؟؟ حاصبر شوية واتلمس الحقائق بإديه

ودلوقتى.. هدوَر على المتناقضات.. الكتاب اللى يطلع فيه غلطة أو تناقض أو كلام أهبل.. يبقى خلاص.. الصراع اتحسم..

لاحظوا ياجماعه انى ماقطعتش الصلاه ولو للحظة واحده.. بس قلبى كان عليه غبار ساعتها.. ودلوقتى بقة..

ومن الحلقة القادمة انشاء الله.. يبدأ الجد.. وتتوالى المفاجآت.. بدأت أشوف بتعمق هما بيقولوا ايه علينا..

ودى كانت فعلا اكتر مرحلة عقلى اتشوش فيها.. الله لايرجعها المفاجآت جت وحده ورا التانية.. لدرجة انى ماكنتش هاقدر استحمل..

المفاجآت جت على 4 مراحل:1-مرحلة هما بيقولوا علينا ايه؟؟

2-مرحلة احنا بنقول عليهم ايه؟؟

3-مرحلة هم عندهم فعلا ايه؟؟

4-مرحلة احنا عندنا فعلا ايه؟؟ومعادنا المرة الجاية مع أول مفاجأة فى أول مرحلة.. ابقوا سدّوا ودانكم وغمّوا عنيكم..

واللى ايمانه ضعيف يستنى لاخر الحلقات واللى ايمانه قوى يفكر بعقله ويطلع الغلط قبل ما أقوله فى الآخر..خدوا بالكم من نفسكم..وادعولى

الى اللقاء فى الحلقة السابعة ان شاء الله

لا اله الا الله

=====================================

الحلقة السابعة

(سورة النورين) حد سمع فيكم عن اسم السوره دي قبل كده؟؟ طب دوروا فى المصحف تانى واتأكدوا..

مفيش!!! صح؟؟ طبعا مفيش!!!!

ده كانت أول حاجة قابلتنى من الحاجات اللى بيقولوها علينا… موقع منيل بنيلة (هم طبعا مواقع ماتتعدش.. بس ده أول واحد تعمقت فيه) طبعا مستحيل أقول أسماء المواقع ده وأنصحكم ماتدوروش.

اسمعوا حكايتى للآخر.. وبعديها اعملوا اللى انتوا عايزينه.

المهم ّنزلت ملف من الموقع ده.. عبارة عن ملف كتابة من النوع pdf وده عنوانه ((القرآن بين العصمة والتحريف))وطبعا بادئ الاستاذ اندراوس (المؤلف) بالترحيب بالمسلمين.. وان المسلمين بيتهموهم ليل ونهار بان كتابهم محرف.. و و و.. الخ.. أول فصل بدأ يتكلم فيه عن القرآت المختلفة للقرآن.. وبيقول ازاى تقولوا ماتحرفش.. وازاى تقولوا فيه قراءات؟؟

قلت فى عقل بالى ايه يعنى.. موضوع القراءات ده معروف من زمان والقرآن نزل على سبعة أحرف فعلا.. وهى قراءات مختلفة وليست نصوص مختلفة ثم بدأ يتعرض لآحاديث على ألسنة الصحابة والصديقين والسيدة عائشة رضى الله عنها تثبت ان القرآن قد نقص منه الكثير.

لن أتحدث عن مدى صحة هذه الاحاديث..فأنا لم أبحث عنها..فقد قلت لكم..لقد وضعت المبادئ التى سأمشى عليها..ّعايزين شككونى فى الاسلام والقرآن؟؟يبقى من القرآن نفسه..الأحاديث أنا كمسم مؤمن بيها آه..بس مش محفوظة..يعنى لو زنقت عليا أوى حقلك مش صحيح!!!!ّ

أنا مؤمن بحاجة واحدة..”انا نحن نزلنا الذكر وانا له لحافظون”ّعايزين تبوظوها؟؟يبقى من القرآن..مش من أى حاجة تانيه..ّوزى مايكون الراجل عارف…وكان المعاد مع سورة النورين..ّ التحدى فى القرآن واضح..”سورة من مثله”ّ

ولو كانت سورة النورين ده من مثله يبقى كده خطر..ّ المهم بدأت أقرأ السوره المزعومه..ّالحاج أندراوس بيقول..ان السورة ده بيؤمن بيها الشيعه على انها من القرآن..ولكن السنيين حذفوها!!!!ّ

والتحدى مكتوب كده بالنص..ّلو كانت سورة من القرآن..يبقى حتة “انا نحن نزلنا الذكر وانا له لحافظون” راحت(معاذ الله) عشان كده يبقى فيه تحريف ونقصانّ

ولو ماكانتش من القرآن..يبقى حتة”فأتوا بسورة من مثله” باظت(معاذ الله) على أساس انها شبه القرآن فى الألفاظ والصيغةّ طبعا اكراما للشيعة..النور التانى اللى هو سيدنا على!!ّايه رأيكم فى الورطه ده؟؟انا مش حاكتبلم السوره انا مش ناقص بلاوى..ّ

بس حاكتبلكم منها الآيات اللى أثبت لنفسى بيها ادعاء هذه السوره..ّ

1-آمنوا بالنورين أنزلناهما يتلوان عليكم آياتى ويحذرانكم عذاب يوم عظيم

2-ان عليا لمن المتقين..وانا لنوفينه حقه يوم الدين..وما نحن عن ظلمه بغافلين..وكرمناه على أهلك أجمعين

دول الآيتين..هم كفيلين انكم تحكموا على الأسلوب(على فكره..بعد ما فقت لنفسى تانى اكتشفت ركاكة الأسلوب..وكأن ربنا كان مغمينى شويه..بس الحمد لله)ّ

المهم ان أسلوبها ساعتها حسيت انه زى…مش قادر أقولها..افهموها انتوا..بس والله العظيم زى مايكون وحى جالى..هو يعنى لما ربنا يقول سوره من مثله..هو القرآن ألفاظ وبس؟؟

دور شويه فيها..ّوالحمد لله..اكتشفت الغلط من الآيتين دول..وساعتها..لاقيتها ركيكة ضعيفة..لاترقى تماما للمقارنة أساسا!!!ّ طبعا انا اكتشفت الغلط بعدين..وحقولوا فى وقته انشاء الله..ها..ايه رأيكم فى مفاجأة النهارده؟؟..ّ

طبعا انا دماغى دلوقتى بايظه..ّ اللى بوظهالى مش السوره المزعومه أكتر من انى اكتشفت انى اللى بنقوله..هما كمان بيقولوه..ّاحنا بنقول على كتابهم محرف..اتاريهم مش ساكتين..وبيردوا كمان..ّوسؤال كبر فى دماغى؟؟ميين الصح؟؟مين الكداب(طبعا مش احنا)ّ

قمت بعديها صليت ..ودعيت..يارب انا عايزك..وانا عارف انك بتحب اللى عايزك ..ماتطولش عليا الموضوع ده..وماتعتبرنيش من الكافرين أنا عارف ان الاسلام صح..بس انا فيا حاجة غلط..ساعدنى يارب

الحلقة الجايه معادنا مع مفاجأة مدويه..ّ

انتظرونى..وادعولى..ّ

لا اله الا الله

نشاهد فى الحلقه القادمة:ّ
————————
1-يانهار اسود؟؟كان شيخ وبعدين…؟؟

2-لا..دى ناس دارسة كويس أوى

3-أمك مصريه مسيحيه؟؟

4-مش عارفه أقولك ايه..بس أنا درست اسلام..ومش عارفه المفروض اقولك الكلام ده ولا لا؟؟

=====================================

الحلقة الثامنة

(الفيل ما الفيل..وما أدراك ما الفيل)..؟

قبل ما أبدأ فى أحداث الحلقة ده.. أحب أوضح حاجة.. واللى حاقوله دلوقتى ده اجتهادى أنا الشخصى والله أعلم بصحته.. عايز أقول حاجة.. ان زمان العرب كانوا قوم فصاحة وبلاغة..

ومع ذلك ماقدروش يقلدوا القرآن فى أى حاجة.. ولما حاولوا.. زى شوية الناس اللى ادعت النبوه زى مسيلمة الكذاب والأسود العنسى.. طلعوا كلام مايقولوش عيل صغير بالعكس.. كلام فى غاية العته.. وقالوا عليه قرآن!!!!

زى مثلا

الفيل ما الفيل.. وما أدراك ما الفيل.. له ذنب وبيل… وخرطوم طويل!!!!! شوفتوا الهبل؟؟؟

لكن نلاحظ فى الآيات بتاعة سورة النورين المزعومه.. انها أكثر حنكه.. بل قد تنطوى على البعض.. وقد تساءلت فى نفسى لماذا؟؟ لماذا أيام فصاحة يقولوا كلام أهبل.. ودلوقتى يكون التقليد أحسن شوية؟؟ ايه الحكمة؟؟؟ فكرت كتير فى الموضوع ده.. ووصلت لحل واحد..

نحن نعلم أن القرآن ملئ بالمعجزات من جميع الأنواع وفى جميع النواحى.. بس زمان.. كان الجانب اللغوى.. هو الجانب الوحيد المدرك من الاعجاز القرآنى.. ولو ربنا كان ساب حد يقول كلام محبوك شويه.. حتى لو كان ملئ بالاخطاء العلمية وغيرها اللى ماكنش حد حاياخد باله من وجودها اساسا.. كانت بقت حتة “سورة من مثله” انضربت(معاذ الله).. وده ماكنش ممكن يحصل.. أما الان.. فقد تطورت الدنيا.. وأصبح موضوع “سورة من مثله” ماينطبقش على الاعجاز اللغوى (الذى لايمكن محاكاته) فقط.. بل أيضا على باقى المعجزات.. علميا وفقهيا ونفسيا (حيث أن سماع القرآن يؤدى الى سكون الأعضاء وهدوء الأعصاب).. يعنى من الآخر..

مستحيل يكون فيه سورة من مثله أبدا عشان كده سورة النورين المزعومة.. حتى لو كانت شبه القرآن فى الألفاظ (وطبعا هى لا تمت له بصلة.. بس بقول لو).. يبقى برده مش من مثله.. ناقصها حاجات كتير يارب تكونوا فهمتونى!!!!؟ ده كان اجتهادى فى محاولة تفسير (ليه زمان قالوا كلام عبيط.. ودلوقتى الكلام أقل عبطا.. مع ان المفروض العكس)؟؟

ده طبعا غير الأخطاء الى حاوضحهالكم انشاء الله فى الآخر فى الآيتين المزعومتين الى كتبتهم.. المهم.. احنا وقفنا المرة اللى فاتت فيين؟؟ آه بعدما قريت أول حجة بيقولوها علينا

وطبعا لا أخفى عليكم.. كنت منهار.. الشيطان الله يحرقه أكتر ماهو محروق.. لعب فى دماغى لعبة الموت!!! واستمريت فى البحث وراء مايقولون.. طبعا فيه شبهات عبيطه بيحاولوا يقولوها لاترقى الى مستوى الشبهة ولا تستطيع اقناع طفل صغير بها.. فمثلا

بعضهم يثيرون الشبهات حول الاية التى تقول

“فَأَتَتْ بِهِ قَوْمَهَا تَحْمِلُهُ قَالُوا يَا مَرْيَمُ لَقَدْ جِئْتِ شَيْئاً فَرِيّاً. يَا أُخْتَ هَارُونَ مَا كَانَ أَبُوكِ اِمْرَأَ سَوْءٍ وَمَا كَانَتْ أُمُّكِ بَغِيا”

فكيف يقول القرآن إنها بنت عمران أبي موسى النبي وإنها أخت هارون، مع أن بينها وبين عمران وهارون وموسى ألف وستمائة سنة؟! ويمكنك أن تتخيل أى رد.. فيمكن أن يكون صحيحا.. يمكنك أن تتخيل أن والدها اسمه عمران.. ولها أخ اسمه هارون.. ومن يدريك؟؟

يمكنك أن تتخيل أن المقصود بأنها تنحدر من نسلهم فهى أخت هارون لأنها من نسله.. والمقصود أنها من نسل شريف.. وغيرها من التبريرات التى تريح العقل دون مجهود
وهكذا وجدتهم (بيهجّصوا) كتير أوى أوى أوى.. وده ريح أعصابى شويه.. بس مايمنعش أن في حاجات تانيه كانت بتيجى على الجرح.. وماكنتش بعرف أرد عليها.. بس كنت بجمع كل حاجة معرفهاش عشان أستعد للسؤال وفضلت كده.. لحد ماقابلتنى الصفحة ده

حوار صريح حول الإسلام

خادم الرب: بولس عبد المسيح (الشيخ محمد النجار سابقاً)!!!!!!!!!!!!!!!!!!

يانهار اسود!!!؟؟ كان شيخ وبعدين…!!!؟؟؟ ده كان عنوان الصفحة.. وعلى فكرة.. اكتشفت بعد كده حاجات من ده كتير يعنى زى احنا مابنسمع عن ناس بتسلم هم كمان بيسمعوا عن مسلمين بيتنصروا.. لأ.. وبيتهودوا كمان!!! وأكتر ماحنا بنسمع كمان وبدت أقرأ الصفحة .. ويارتنى ماقريت… أسلوب ساحر.. قوى.. دارس.. فاهم.. خلانى أمشى معاه للآخر

مش حاقدر أقولكم طبعا خادم الرب ده قال ايه.. سواء كان الكلام ده حقيقى ولا لا.. بس حاعرض جزء صغير من كلامه:

“أما كتابي هذا (هل الإسلام من عند الله) فهو حصيلة محاوراتي هنا في بلدي أجريته مع إخوة مسلمين من جنسيات مختلفة، وأشكر الله أنني أحتفظ بصداقة معظمهم رغم التباين الكبير بين آراء كل منا، لكن هذا لم يمنع حدوث احتكاكات مع بعضهم وحدوث تصرفات مؤلمة من جانبهم,, وقد حاول أحدهم خنقي بيده، وآخر هددني بالقتل، ناهيك على السيل العارم من الشتائم الجارحة، لكني أحب الجميع, والمسيحية التي آمنت بها تعلمني أن المحبة تحتمل كل شيء من أجل بلوغ الهدف وهو الله، أسمى هدف يمكن أن يبلغه الإنسان – وقد وضع الله في قلبي محبة كبيرة جداً لإخوتي المسلمين، ليس ذلك فحسب بل ما هو أبعد من ذلك، فلقد شاء الله أن يختارني للتبشير لهم بالرب يسوع المخلص الوحيد والذي لا يوجد أحد غيره ينبغي به أن يخلص الإنسان؟ فهذه هي رسالتي تجاههم، والتي لأجلها أعيش ولأجلها أيضاً سأموت حينما يحين الوقت وهو الآن صار قريباً جداً عن أي وقت مضى – لأن ما كنت أقوله هامساً صرت أنادي به بصوت عالٍ”

ده كانت المقدمة.. فلم يسعنى الا انى أمشى وراه للأخر.. يانهار اسود.. الراجل ده يا اما كان مسلم فعلا.. ياما مستشرق من الجامدين قوى اللى عارفين بيقولوا ايه لا.. دى ناس دارسة كويس أوى وطبعا كان تركيزه كله.. على جزئين رئيسين:

1-القتال والحروب فى الاسلام

2-التحريف فى القرآن مستندا فى ذلك على أحاديث للصحابة والتابعين (وطبعا ده حنتجاهله لاسباب قلناها قبلا)

أما جزء القتال.. فلن أحدثكم عن الأسلوب ولا عن الطريقة التى تناول بها الموضوع.. وخاصة حينما تعرض للايات التى تحث المؤمنين على القتال فى القرآن ورغم قراءاتى السابقة.. وفهمى لموضوع القتال من أجل اعلاء كلمة الحق.. الا انه استطاع ان يضربنى فى مقتل وللعلم. كانت هذه هى أكثر النقاط استحواذا على عقلى وقد تطلب منى الأمر مجهودا قاتلا ودعاءا مستمرا حتى أستطيع أعادة فهمها من جديد.. والحمد لله.. وسأشرح لكم موضوع القتل والجزية.. وسأثبت لكم أنشاء الله.. أنها بالفعل.. حق واقع.. وسنة الهيه على البشر..

لا اله الا الله

نشاهد فى الحلقه القادمة:
————————

1-أمك مصريه مسيحيه؟؟

2-مش عارفه أقولك ايه..بس أنا درست اسلام..ومش عارفه المفروض اقولك الكلام ده ولا لا؟؟

Advertisements
%d مدونون معجبون بهذه: